IPL வரலாற்றில் அதிக சராசரி வைத்துள்ள முதல் 5 வீரர்கள்

உலகின் மிகப்பெரிய மற்றும் பிரபலமான தொடர்களின் ஒன்று IPL. 2008ம் ஆண்டு தொடங்கப்பட்ட இந்த தொடரின் முதல் போட்டியே ரசிகர்களின் கண்களுக்கு விருந்தாக அமைந்தது. கொல்கத்தா நைட் ரைடர்ஸ் மற்றும் ராயல் சேலஞ்சர்ஸ் இடையே நடந்த இப்போட்டியில் நியூஸிலாந்து அணியின் முன்னாள் கேப்டன் பிரண்டன் மெக்கல்லம் 73 பந்துகளில் 158 ரன்கள் எடுத்து கடைசி வரை ஆட்டமிழக்காமல் இருந்தார். சரவெடியாய் வெடித்த இவர், எதிரணியின் பந்து வீச்சாளர்களை துவம்சம் செய்துவிட்டார்.

முதல் போட்டியே IPL-இன் மிகப்பெரிய வளர்ச்சிக்கு முதல் படியாக அமைந்தது. ஆனால் அந்த போட்டிக்கு பிறகு அவர் எந்த போட்டியிலும் பெரிதாக சாதிக்கவில்லை. அதே போல் ஒரே ஒரு ஆண்டு மட்டும் சிறப்பாக செயல்பட்டுவிட்டு அடுத்த வருடம் காணாமல் போனவர்களும் இதில் அடங்கும். அப்படி குறிப்பிட்டு பார்த்தால் இந்திய வீரர்களே இந்த வரிசையில் அதிகம். கீழ்கண்ட பதிவில் நாம் காணவிருப்பது, IPL தொடரில் அதிக சராசரி வைத்துள்ள முதல் ஐந்து வீரர்களை காணப்போகிறோம். குறைந்தபட்சம் 30 ஆட்டங்களும் இரண்டு தொடரில் பங்கேற்று உள்ளவர்களும் இதில் அடங்குவர்.

5. ஷான் மார்ஷ்

Shaun Marsh

ஷான் மார்ஷ், IPL முதல் தொடருக்கு முன் இந்த பெயரை பெரும்பாலானவர்களுக்கு தெரியாது. ஆனால் அந்த ஆண்டு IPLன் ஆரஞ்சு கேப்பை கைப்பற்றி சென்றார். ஒரு தொடரில் அதிக ரன்களை குவித்த வீரர்களுக்கு வழங்கப்படும் விருது ஆரஞ்சு கேப். 2008ம் ஆண்டு நடைபெற்ற தொடரின் பாதியில் கிங்ஸ் XI பஞ்சாப் அணியில் இடம் பெற்ற இவர், தனது திறமையால் அனைவரையும் கவர்ந்தார். குறிப்பாக பஞ்சாப் அணி அரை இறுதி சென்றதுக்கு முக்கிய காரணமாக இவர் கருதப்பட்டார். இடது கை பேட்ஸ்மேனான இவர் பந்தை பௌண்டரிக்கு அடிப்பதில் வல்லவராக இருந்தார்.

முதல் சீசனில் 600 ரன்களுக்கு மேல் குவித்த இவர், அதன் பிறகு பெரிதாக இதே போன்ற ஆட்டத்தை வெளிப்படுத்த தவறினார். அடுத்தடுத்த சீசனில் மில்லர், மாஃஸ்வெல் போன்ற வீரர்களின் வருகையால் அணியில் இடம்பிடிக்க முடியாமல் போனது. இதுவரை IPL தொடர்களில் மொத்தம் 69 ஆட்டங்களில் பங்கேற்றுள்ள இவர், 2477 ரன்களை குவித்துள்ளார். சராசரியாக 39.95 ரன்களும், ஸ்ட்ரைக் ரைட்டாக 132.74 உம் வைத்துள்ளார். தனது அதிகபட்ச ஸ்கோராக 115 ரன்களை வைத்துள்ள இவர், 20 அரை சதங்களும் 1 சதமும் அடித்துள்ளார்.

4. மகேந்திர சிங் தோனி

Mahendra Singh Dhoni

மகேந்திர சிங் தோனி, "பேர கேட்ட உடனே சும்மா அதிருத்துள்ள" என்ற பஞ்ச் டயலாக்கேற்ப எதிரணி வீரர்களுக்கு சிம்ம சொப்பனமாய் திகழ்பவர். "தல" என்று சென்னை ரசிகர்களால் பெரும்பாலும் அழைக்கப்பட்ட இவரை தற்போது இந்தியா முழுவதும் அதே பெயரை கொண்டு செல்லமாக அழைக்கின்றனர். சென்னை அணிக்கு அதிக ரன்கள் மற்றும் சிக்ஸர்கள் எடுத்தவர்கள் பட்டியலில் இரண்டாம் இடம் இவருக்கே. தொடர்ந்து சென்னைக்கே விளையாடிய இவர், இரண்டு ஆண்டுகள் மற்றும் புனே அணிக்கு விளையாடினார். மீண்டும் இந்த ஆண்டு நடைபெற்ற தொடரில் சென்னைக்கு கேப்டனாக திரும்பி விளையாடிய இவர், கோப்பையை கைப்பற்றி அசத்தினார். மேலும் இவ்வாண்டில் 450 ரன்களுக்கு மேல் எடுத்து அணியின் வெற்றிக்கு வித்திட்டார். இதுவரை IPLல் 158 போட்டிகளில் பங்கேற்றுள்ள இவர் 4015 ரன்கள் குவித்துள்ளார். தனது அதிகபட்ச ஸ்கோராக 79 ரன்களையும் சராசரியாக 40.15 ரன்களும் வைத்துள்ளார். மிடில் ஆர்டர் பேட்ஸ்மேனான இவர் 20 அரைசதங்களையும் கடந்துள்ளார்.

3. டேவிட் வார்னர்

David Warner

“பாக்கெட் டைனமைட்” என்று செல்லமாக அழைக்கப்படுபவர் வார்னர். டெல்லி டேர் டெவில்ஸ் அணிக்காக இவரது IPL வாழ்க்கையை தொடங்கினார். சேவாக்கை போன்று அதிரடி காட்டக்கூடிய வார்னர், அந்த அணியின் மிகச்சிறந்த பேட்ஸ்மேன்கள் வரிசையில் இடம் பிடித்தார். டெல்லி அணிக்காக அதிக ரன்கள் குவித்தவராகள் பட்டியலில் இன்றும் இரண்டாம் இடம் வகிக்கிறார். அதன் பிறகு சன் ரைஸர்ஸ் ஹைதெராபாத் இவரை நல்ல தொகை கொடுத்து ஏலத்தில் எடுத்தது. அணியின் கேப்டனாக பொறுப்பேற்ற வார்னர், 2016ம் ஆண்டு நடந்த IPL தொடரில் ஹைதெராபாத் அணி கோப்பை வெல்ல முக்கிய பங்கு வகித்தார்.

பால் டாம்பெரிங் (Ball Tampering) என்ற குற்றம் காரணமாக ஆஸ்திரேலிய கிரிக்கெட் வாரியத்தால் விளையாட தடை விதிக்கப்பட்டது. இதனை தொடர்ந்து 2018ம் ஆண்டின் IPL தொடரில் இருந்து விலகிக்கொண்டார். கேப்டன் பொறுப்பை வில்லியம்சன் ஏற்றுக்கொண்டார். இதுவரை 114 போட்டிகளில் 4014 ரன்கள் குவித்துள்ள வார்னர், சராசரியாக 40.55 ரன்களை வைத்துள்ளார். இதில் 36 அரை சதங்களும் 3 சதமும் அடங்கும். மேலும் இவரது ஸ்ட்ரைக் ரைட் 142.14 ஆக உள்ளது. இது டெல்லி அணிக்கு விளையாடியதை விட 24 புள்ளிகள் அதிகம்.

4. கிறிஸ் கெய்ல்

Chris Gayle

உலகின் மிகச்சிறந்த T20 பேட்ஸ்மேன்களில் ஒருவரான கிறிஸ் கெய்ல், கடந்த நான்கு ஐந்து வருடங்களாக IPL தொடரில் தன் ஆதிக்கத்தை செலுத்தி வருகிறார். 2008 முதல் 2010 வரை கொல்கத்தா அணிக்கு விளையாடிய இவர், 3 சீசனிலும் சரியாக விளையாடாத காரணத்தால் 2011 ஆண்டிற்கான ஏலத்தில் விலை போகாமல் இருந்தார். பின்பு காயம் காரணமாக டிர்க் நன்னெஸ் தொடரிலிருந்து வெளியேறியதால் அவருக்கு மாற்று வீரராக பெங்களூர் அணி கிறிஸ் கெய்லை வாங்கியது. அதன் பின் நடந்த அனைத்தும் சரித்திரத்தில் தான் இடம் பெற்றது. தொடர்ந்து இரண்டு வருடம் ஆரஞ்சு கேப் விருதை தட்டிச்சென்ற கெய்ல் முறியடிக்காத சாதனைகளே இல்லை என கூறலாம். 2017 வரை பெங்களூர் அணிக்காக விளையாடிய இவரை 2018 ஆம் ஆண்டு பஞ்சாப் அணி வாங்கியது.

இதுவரை 111 போட்டிகளில் பங்கேற்றுள்ள கெய்ல் 3994 ரன்கள் சேர்த்துள்ளார். இதிலே 24 அரை சதங்களும் 6 சதங்களும் அடங்கும். இவரது சராசரியாக 41.18 ரன்கள் வைத்துள்ளார். இதுவரை IPL தொடரில் மொத்தம் 290 சிக்ஸர்கள் உடன் சிக்ஸர்கள் அதிகம் அடித்த வீரர்கள் பட்டியலில் முதல் இடத்தில உள்ளார். இந்த சாதனையானது இரண்டாம் இடம் பிடித்த தோனியை விட 104 சிக்ஸர்கள் அதிகம்.

5. கேன் வில்லியம்சன்

Kane Williamson

நியூஸிலாந்து அணியின் கேப்டனான வில்லியம்சன், 2017 ஆம் ஆண்டு வரை சரியாக அணியில் இடம் கிடைக்காமல் தன் வாய்ப்புக்காக காத்திருந்தார். ஆனால் 2018 ஆம் ஆண்டு இவருக்கு திருப்புமுனையாக அமைத்தது. வார்னருக்கு பதிலாக கேப்டன் பொறுப்பை ஏற்ற வில்லியம்சன், ஹைதெராபாத் அணியை இறுதி போட்டிவரை அழைத்துச் சென்றார். மேலும் இவ்வருடத்தின் ஆரஞ்சு கேப் விருதையும் தன்வசமாக்கினார். விளையாடிய அனைத்து போட்டியிலும் தனக்கான பாணியில் விளையாடி அணியின் வெற்றிக்கு வித்திட்டார். இதுவரை 32 போட்டிகளில் 1146 ரன்கள் குவித்துள்ள வில்லியம்சன், சராசரியாக 42.44 ரன்கள் வைத்துள்ளார். இதில் 11 அரை சதங்கள் அடங்கும். மேலும் இவரது ஸ்ட்ரைக் ரைட் 137.11 ஆக உள்ளது. இவரது அதிகபட்ச ஸ்கோராக 89 ரன்கள் அடித்துள்ளார்.