உலக கோப்பையில் இதுவரையிலான போட்டிகளில் ராகுலின் ஆட்டம் எப்படியிருந்தது – ஒரு பார்வை

வேகப்பந்து மற்றும் சுழற்பந்தை அவர் கையாண்ட விதம்:

வேகப் பந்துவீச்சு

இந்த உலக கோப்பையில் இதுவரை ஐந்து முறை அவுட்டாகியுள்ள ராகுல், அதில் நான்கு முறை வேகப் பந்துவீச்சில் தனது விக்கெட்டை பறி கொடுத்துள்ளார். மொத்தமாக 151 பந்துகளை சந்தித்து, 85 ரன்கள் மட்டுமே அடித்து 60 என்ற மிக குறைவான ஸ்ட்ரைக் ரேட்டை வைத்துள்ளார் ராகுல். இதில் குறிப்பிடத்தகுந்த விஷயம் என்னவென்றால், இதில் 101 பந்துகள் டாட் பால்கள்.

போட்டியின் தொடக்கத்தில் வேகப் பந்துவீச்சை சமாளிப்பது கடினம் தான். இது அனைவருக்கு தெரிந்த விஷயமே. கொஞ்சம் நிதானமாக விளையாடுவது கூட நல்லது தான். அதற்காக இப்படியா மெதுவாக ஆடுவது? தொடக்க பேட்ஸ்மேன்கள் மெதுவாக விளையாடியதால் கடைசியில் இந்திய அணிக்கு என்ன நேர்ந்தது என நேற்றைய போட்டியில் பார்த்தோம். இனியாவது இந்த தவறை திருத்திக்கொள்வாரா ராகுல்?

KL Rahul

சுழற்பந்துவீச்சு

ஒரே ஒரு முறை மட்டுமே சுழற்பந்துவீச்சில் அவுட்டாகியுள்ளார், அதுவும் ஆஃப்கானிஸ்தானிற்கு எதிராக. இதுவரை ஸ்பின்னர்களை சிறப்பாக விளையாடி இருந்தாலும் இன்னும் ராகுலின் ஆட்டம் மேம்பட வேண்டும். சுழற்பந்துவீச்சில் 98 பந்துகளை சந்தித்து 87 ரன்கள் அடித்துள்ளார். இதில் 42 டாட் பால்களையும் சேர்த்துக்கொள்ள வேண்டும். வேகப் பந்துவீச்சை ஒப்பிடும் போது இது குறைவு தான்.

இனி வரும் போட்டிகளிலும் ராகுலே ஓபனிங் இறங்குவார் என தெரிகிறது. அடுத்து வங்கதேசம் மற்றும் இலங்கை அணிகளையே சந்திக்கவுள்ளது இந்தியா. ஒப்பீட்டளவில் இந்த இரு அணிகளும் நம்மை விட பலம் குறைந்தவையே. இந்தப் போட்டிகளில் மிகப் பெரிய ஸ்கோரை ராகுல் அடிக்க வேண்டியது கட்டாயமாகும். அப்போது தான் அரையிறுதி போட்டியை நேர்மறையான மன்நிலையில் சந்திக்கலாம். பொறுப்பை உணர்ந்து விக்கெட்டை எளிதாக கொடுக்காமல் தனது வழக்கமான ஆட்டத்தை விளையாடினாலே ராகுலால் மிகப்பெரிய ஸ்கோரை அடிக்க முடியும். அதை செய்வாரா?