ஐபிஎல் வரலாறு : ஐபிஎல் மூலமாக சர்வதேச கிரிக்கெட்டில் ஜொலித்த மூன்று வீரர்கள்

ஐபிஎல் போட்டிகள் எப்போதுமே கிரிக்கெட்டில் ஆர்வமும் திறமையும் உள்ள வீரர்களுக்கு நல்ல வாழ்க்கையை அடித்தளமாக அமைத்துக் கொடுத்துள்ளது. ஐபிஎல் போட்டிகளில் விளையாடிய வீரர்களின் வாழ்க்கையை எந்த அளவிற்கு இது மாற்றி உள்ளது என்பது கடந்த சில வருடங்களாக பார்த்து வருகிறோம்.

இப்போது மொத்தமாக எட்டு அணிகள் ஐபிஎல்லில் விளையாடி வருகின்றன. பல்வேறு வீரர்கள் பல்வேறு அணிகளுக்காக விளையாடி உள்ளனர். அவர்கள் அந்தந்த அணிகளுக்காக அற்புதமாக விளையாடி தங்கள் திறமையை தங்கள் நாட்டு அணிக்கு காண்பித்து தேசிய அணிகளில் இடம்பிடித்தனர்.

இந்திய அணியைப் பொறுத்தவரை கணக்கற்ற வீரர்கள் ஐபிஎல்லின் மூலமாக தேசிய அணியில் இடம்பிடித்துள்ளனர். அவர்கள் எல்லோர் பெயரையும் இங்கு குறிப்பிட இயலாது. குறிப்பிட்ட சிலரை சொல்ல வேண்டுமானால் ஹர்திக் பாண்டியா, குருனால் பாண்டியா, ரவிச்சந்திரன் அஸ்வின், யுஸ்வேந்திர சாஹல், ரிஷப் பண்ட் , ஜஸ்பிரீத் பும்ரா, ரவீந்திர ஜடேஜா, கேஎல் ராகுல், அம்பத்தி ராயுடு, முரளி விஜய், சஞ்சு சாம்சன் ஆகியோரை குறிப்பிட்டு சொல்லலாம். ஆனால் வெளிநாட்டு வீரர்களும் ஐபிஎல் மூலமாக வெளிச்சத்திற்கு வந்துள்ளனர். அவர்கள் ஐபிஎல்லை ஏணி படிக்கட்டாக மாற்றி முன்னேறி உள்ளனர். குறிப்பிட்டு சொல்ல வேண்டும் என்றால் ஜோஃப்ரா ஆர்ச்சரை சொல்லலாம். அவர் ஐபிஎல்லில் சிறந்து விளையாடி வந்ததால் இங்கிலாந்து அணிக்காக சர்வதேச கிரிக்கெட்டில் கால் பதிக்கவுள்ளார். அவருக்கு முன்பாக ஐபிஎல் போட்டிகள் மூலமாக தேசிய அணியில் இடம்பெற்ற முக்கியமான சிலரைப் பற்றி இந்த கட்டுரையில் காண்போம்.

#1 கீரான் பொல்லார்ட் :

அதிரடி வீரரான கீரான் பொல்லார்ட் டிரினிடாட் அண்டு டொபாகோவில் பிறந்தார். 2005 ஆம் ஆண்டு பாகிஸ்தானுக்கு எதிரான 19 வயதுக்கு உட்பட்டோருக்கான மேற்கிந்திய தீவுகள் அணியில் பொல்லார்ட் இடம்பெற்றார். அந்தத் தொடரில் நன்றாக செயல்பட்டதால் அடுத்த ஆண்டு நடைபெற்ற இளையோர் உலககோப்பைக்கான மேற்கிந்திய தீவுகள் அணியில் இடம் பெற்றார். ஆனால் அந்த உலககோப்பையில் அவர் சரியாக விளையாடவில்லை.

2009 ஆம் ஆண்டு நடந்த சாம்பியன்ஸ் லீக் டி20 போட்டியில் அபாரமாக செயல்பட்டதன் மூலம் அடுத்தாண்டு நடைபெற்ற ஐபிஎல் ஏலத்தில் பொல்லார்ட்டை தங்கள் அணிப் பக்கம் இழுக்க சென்னை சூப்பர் கிங்ஸ், கொல்கத்தா நைட் ரைடர்ஸ், மும்பை இந்தியன்ஸ், ராயல் சேலஞ்சர்ஸ் பெங்களூர் அணிகள் போட்டி போட்டன. முடிவில் மும்பை இந்தியன்ஸ் அணி பொல்லார்ட்டை தங்கள் பக்கம் இழுத்தது. பொல்லார்ட் இதுவரை மொத்தம் 144 ஐபிஎல் போட்டிகளில் விளையாடி உள்ளார். 133 இன்னிங்சில் 28.47 என்ற சராசியுடன் 2705 ரன்களை குவித்துள்ளார். அவருடைய அதிகபட்ச ஸ்கோர் 83 ஆகும்.

2010 ஆம் ஆண்டு ஐபிஎல் போட்டிகளில் சிறப்பாக செயல்பட்டதன் மூலம் அந்த ஆண்டு நடைபெற்ற டி20 உலககோப்பைக்கான மேற்கிந்திய தீவுகள் அணியில் இடம் பெற்றார். அதன் பிறகு மேற்கிந்திய தீவுகள் அணிக்காக விளையாடி வருகிறார். தற்போது உலக அளவில் பல்வேறு டி20 தொடர்களிலும் விளையாடி வருகிறார். 100 ஒரு நாள் போட்டிகளுக்கு மேல் விளையாடினாலும் அவர் இன்னும் டெஸ்ட் கிரிக்கெட் போட்டியில் விளையாடியது இல்லை என்பது குறிப்பிடத்தக்கது.

2 சுனில் நரைன்

சுனில் நரைன் 2009 ஆம் ஆண்டு டிரினிடாட் அண்டு டொபாக்கோ அணி சார்பில் முதல் தர போட்டிகளில் அறிமுகமானார். ஆனால் அந்த தொடரில் அவரால் சோபிக்க முடியவில்லை. 2011 ஆம் ஆண்டு நடந்த கரீபியன் டி20 தொடரில் முதன் முதலாக டி20 போட்டியில் அறிமுகமானார். அந்த தொடரில் ஜொலித்த நரைன் அதே ஆண்டு நடைபெற்ற சாம்பியன்ஸ் லீக் டி20 தொடரிலும் கலக்கினார். குறுகிய காலமே நடைபெற்ற சாம்பியன்ஸ் லீக் டி20 போட்டிகளில் அதிக விக்கெட்டுகளை கைப்பற்றியவர் என்ற சாதனையை படைத்தார். 2012 ஆம் ஆண்டு கொல்கத்தா நைட் ரைடர்ஸ் அணிக்காக ஐபிஎல்லில் விளையாட துவங்கினார். அதன் பிறகு கொல்கத்தா அணியின் முக்கியமான வீரராக மாறிப் போனார்.

அவர் அந்த அணியில் மூலமாக தான் சிறந்த ஆல் ரவுண்டர் என்றும் நிரூபித்தார். அவர் மொத்தம் 108 ஐபிஎல் போட்டிகளில் விளையாடியுள்ளார்,133 விக்கெட்டுகளை 6.66 என்ற அற்புதமான எகானமி விகிதத்தில் கைப்பற்றி உள்ளார். அவர் பேட்டிங்கில் 771 ரன்களை 17.52 என்ற சராசியுடன் எடுத்துள்ளார். அவருடைய அதிகபட்ச ஸ்கோர் 75 ஆகும். அவர் தன் தேசிய அணிக்காக 50 விக்கெட்டுகளை வீழ்த்தி உள்ளார். தற்போதும் கொல்கத்தா நைட் ரைடர்ஸ் அணிக்காக விளையாடி வரும் சுனில் நரைன் அந்த அணியின் துருப்பு சீட்டாக இருந்து வருகிறார். அவரை ஆல் ரவுண்டராக மாற்றிய பெருமை கௌதம் கம்பீரையே சேரும். தொடக்க ஆட்டக்காரராக விளையாடி வந்த நரைன் தற்போது நடு வரிசையில் விளையாடி வருகிறார்.

3 ஷேன் வாட்சன்

ஷேன் வாட்சன் முதல் ஐபிஎல் தொடரில் இருந்தே விளையாடி வருகிறார். அவர் ராஜஸ்தான் ராயல்ஸ் அணிக்காக 2008 ஆம் ஆண்டு அறிமுகமானார். அந்த தொடரில் ஷேன் வாட்சன் ஆல் ரவுண்டராக ஜொலித்தார். நான்கு அரைசதங்களும் அடித்தார், அதில் ஒன்று அரைஇறுதி போட்டியில் அடிக்கப்பட்டதாகும். அவர் 17 விக்கெட்டுகளையும் நான்கு முறை ஆட்டநாயகனாகவும் தேர்வு செய்யப்பட்டார். அந்த ஐபிஎல் தொடரின் ஆட்டநாயகனாகவும் தேர்வு செய்யப்பட்டார்.

ஐபிஎல் போட்டிகளில் ஜொலித்ததன் மூலம் மேற்கிந்திய தீவுகள் அணிக்கு எதிரான தொடரில் தேர்வு செய்யப்பட்டிருந்த மேத்யூ ஹைடன் காயமடைந்திருந்ததால் மாற்று வீரராக வாட்சன் தேர்வு செய்யப்பட்டார். அதற்கு முன்பு ஆஸ்திரேலிய அணிக்கு வருவதும் போவதுமாக இருந்து வந்த வாட்சன் அந்த தொடருக்குப் பின் நிரந்தர உறுப்பினர் ஆனார். அவர் ஆஸ்திரேலிய அணிக்காக ஒருநாள் கிரிக்கெட் போட்டிகளில் மொத்தம் 5500 ரன்களும் 168 விக்கெட்டுகளை 31.50 என்ற சராசியுடன் வீழ்த்தி உள்ளார். டி20 போட்டியில் சதமடித்த முதல் ஆஸ்திரேலிய கேப்டன் என்ற பெருமைக்குரியவர் வாட்சன்.

வாட்சன் ஒருநாள் மற்றும் டி20 போட்டிகளில் ஆஸ்திரேலிய அணிக்காக விளையாடிய சிறந்த ஆல் ரவுண்டர்களுள் ஒருவர் ஆனார். அதற்கு ஐபிஎல்லே முழுமுதற் காரணம் என்பது பெருமைக்குரிய விஷயமாகும். ஷேன் வாட்சன் தற்போது சர்வதேச கிரிக்கெட்டில் இருந்து ஓய்வு பெற்று விட்டார். ஆனாலும் உலகெங்கும் நடக்கும் உள்ளூர் டி20 போட்டிகளில் விளையாடி வருகிறார். தற்போது ஐபிஎல்லில் சென்னை சூப்பர் கிங்ஸ் அணிக்காக விளையாடி வருகிறார்.